Trobasons ten indexats 299 grops, 774 albums e 9.216 cançons

Nouvè Ensèn

Stéphan Manganelli

Paraulas

Nouvè, Nouvè
Siéu toujour l’enfant
Nouvè, Nouvè
Qu’embelines tant
Nouvè, Nouvè
Iéu me souvene de toun tèms
Ounte iéu emé mi parènt
Èrian tras qu’urous e countènt.

Nouvè, Nouvè
Lou passa ensèn
Nouvè, Nouvè
Un trefoulimen
Nouvè, Nouvè
Pèr elegi lou bèu sapin
L’adourna ‘mé de serpentin
Lou faire lusi diamantin.

Santo Barbo vèn
Adure soun blad dins tres sieto
Pièi vèn lou belèn
‘mé lou verd-bouisset e la fèsto
Nouvè, Nouvè
Dins l’esperit di tradicioun
Coume se fai dins soun cantoun
Despièi milo generacioun.

Nouvè, Nouvè
Toun vespre s’adus
Nouvè, Nouvè
Aboundant de lus
Nouvè, Nouvè
Bèn m’acata dedins moun lié
Pantaia de touca dóu det
Lou barbassu e si jouguet.

Nouvè, Nouvè
Ai lou treboulèri
Nouvè, Nouvè
Pèr toun grand mistèri
Nouvè, Nouvè
E tre que lou soulèu sourtié
Ère adejà dins mi soulié
À tafura li miéu jouguet.

E manja ensèn
Uno divino anchouiado
E manja ensèn
Un pau de merlusso en brandado
Nouvè, Nouvè
Dins l’esperit di tradicioun
Coume se fai dins soun cantoun
Despièi milo generacioun.

Cacho-fiò,
Bouto fiò!
Alègre ! Alègre!
Diéu nous alègre!
Calèndo vèn, tout bèn vèn!
Diéu nous fague la gràci
De vèire l’an que vèn,
E se noun sian pas mai,
Que noun fuguen pas mens!

Nouvè, Nouvè
Siegue un boumbimen
Nouvè, Nouvè
Pèr tóuti li gènt
Nouvè, Nouvè.
Nouvè de mèu - Pocheta

As mai d’informacions sus aquesta cançon? La nos pòdes mandar per mejan d’ aqueste formulari.